مقبول اداکار و ٹی وی میزبان عمران اشرف کی آنے والی کینیڈین بھارتی پنجابی فلم ’اینا نوں رہنا سہنا نئیں آندا‘ کا ٹریلر جاری کرتے ہوئے اسے آئندہ ماہ پیش کرنے کا اعلان کردیا گیا۔
عمران اشرف مذکورہ کینیڈین بھارتی پنجابی فلم سے قبل متعدد پاکستانی فلموں میں کام کر چکے ہیں، تاہم وہ پہلی بار کسی غیر ملکی فلم میں نظر آئیں گی۔
فلم کی زیادہ تر کاسٹ کینیڈین نژاد بھارتی اداکاروں پر مشتمل ہے، تاہم اس میں دیگر پاکستانی پنجابی اداکار بھی نظر آئیں گے۔
’اینا نوں رہنا سہنا نئیں آندا‘ میں عمران اشرف مرکزی کردار میں نظر آئیں گے، فلم کی ہدایات روپن بال دیں گے جب کہ اس میں بھارتی پنجابی گلوکار و اداکار جیسی گل بھی ایکشن میں نظر آئیں گے۔
فلم کی دیگر کاسٹ میں رنجیت باوا، مینڈے ٹکھڑ، سپنا پبی، نمال رشی، ناصر چنیوٹی اور نوپریت بانگا سمیت دیگر اداکار شامل ہیں۔
فلم کے جاری کیے گئے ٹریلر سے کہانی سمجھنا مشکل ہے، تاہم عندیہ ملتا ہے کہ فلم کی کہانی نوجوان طلبہ کے گرد گھومتی ہے۔
رومانٹک کامیڈی فلم کے ٹریلر کو کافی پذیرائی مل رہی ہے اور فلم کی ٹیم نے اسے آئندہ ماہ اگست میں ریلیز کرنے کا اعلان کردیا۔
’اینا نوں رہنا سہنا نئیں آندا‘ کی زیادہ تر ٹیم کینیڈین نژاد بھارتیوں پر مشتمل ہے، اسی لیے فوری طور پر بھارتی ہندوؤں نے اس میں پاکستانی اداکاروں کے کام پر اعتراض نہیں کیا۔
ممکنہ طور پر مذکورہ فلم کو بھی بھارت کے بغیر دیگر ممالک میں ریلیز کیا جائے گا، اسے پاکستان میں بھی ریلیز کیے جانے کا امکان ہے۔
