پاکستانی کیوئسٹ حسنین اختر نے تاریخ رقم کر دی ، قومی کیوئسٹ آئی بی ایس ایف انڈر 17 کے عالمی چیمپئن بن گئے ہیں۔
بحرین کے دارالحکومت مناما میں جاری چیمپئن شپ کے فائنل مقابلے میں قومی کیوئسٹ محمد حسنین نے ویلز کے رائلی پاول کو یک طرفہ مقابلے میں سے0-4 سے شکست دے کر ٹائٹل اپنے نام کر لیا ہے۔
16 سالہ حسنین اختر نے کھیل کے آغاز کے ساتھ ہی بہترین کھیل کا مظاہرہ کرتے ہوئے حریف کھلاڑی کو سنبھلنے کا موقع ہی نہیں دیا۔
قبل ازیں، سیمی فائنل مقابلے میں حسنین اختر نے پولینڈ کے الیور نیزالیک کو 0-4 ،کوارٹرفائنل میں پولینڈ ہی کے کژیزٹوف چاپنک کو 1-3 اور پری کوارٹر فائنل میں عمان کے معتصم السعدی کو 0-3 سے شکست دی تھی۔
