بلوچستان کے ضلع قلات کے علاقے نیمرغ میں نامعلوم افراد نے مسافر کوچ پر فائرنگ کر دی، جس کے نتیجے میں 3 افراد جاں بحق اور متعدد زخمی ہو گئے۔
ترجمان حکومت بلوچستان شاہد رند نے تصدیق کرتے ہوئے بتایا کہ افسوس ناک واقعے میں 3 مسافر شہید جبکہ 7 زخمی ہوئے۔
انہوں نے کہا کہ قلات کے علاقے نمرغ میں کراچی سے کوئٹہ آنے والی مسافر کوچ پر فائرنگ کا واقعہ رونما ہوا، سیکیورٹی ادارے، ضلعی انتظامیہ اور ریسکیو ٹیمیں فوری طور پر جائے وقوعہ پر پہنچ چکی ہیں۔
ترجمان حکومت بلوچستان کا کہنا تھا کہ زخمیوں کو ڈی ایچ کیو ہسپتال قلات منتقل کیا جا رہا ہے، ڈی ایچ کیو ہسپتال قلات میں ایمرجنسی نافذ کر دی گئی ہے۔
ترجمان حکومت بلوچستان کے مطابق سیکیورٹی فورسز نے علاقے کو گھیرے میں لے لیا ہے اور سرچ آپریشن جاری ہے، سیکیورٹی فورسز حملہ آوروں کا تعاقب کر رہی ہیں۔
اظہار مذمت
صدر مملکت آصف زرداری نے قلات میں مسافر کوچ پر حملے کی شدید مذمت کرتے ہوئے افسوسناک واقعے میں قیمتی جانی نقصان پر گہرے دکھ اور افسوس کا اظہار کیا ہے۔
صدر آصف زرداری کا کہنا تھا کہ عام شہریوں کو نشانہ بنانا انتہائی سفاکانہ اورقابل مذمت فعل ہے، دہشت گرد امن و استحکام کو سبوتاژ کرنا چاہتے ہیں، یہ انسانیت اور امن کے دشمن ہیں۔
انہوں نے کہا کہ قوم کی حمایت سے دہشت گردی کے ناسور کا مکمل خاتمہ کریں گے، ریاست دہشت گردی کے خلاف قوت سے کارروائی جاری رکھے گی۔
دریں اثنا، وزیراعلیٰ بلوچستان نے جاری بیان میں کہا کہ قلات میں مسافر کوچ پرحملہ بزدلانہ فعل اوردہشتگردی ہے، قیمتی جانوں کاضیاع ناقابلِ تلافی قومی نقصان ہے۔
انہوں نے کہا کہ فتنہ الہندوستان کی دہشتگرد تنظیمیں پہلے شناخت کی بنیاد پر حملے کرتی تھیں، اب عام شہری نشانہ بن رہے ہیں۔
سرفراز بگٹی کا کہنا تھا کہ یہ حملے ہر پاکستانی کے خلاف اعلانِ جنگ ہیں، دہشت گردوں کو ہر قیمت پر ناکام بنائیں گے۔
وفاقی وزیر داخلہ محسن نقوی نے قلات کے قریب مسافر بس پر فتنہ الہندوستان کے دہشت گردوں کی فائرنگ و حملے کی مذمت کی ہے۔
ان کا کہنا تھا کہ فتنہ الہندوستان کے دہشتگردوں کا بے گناہ اور معصوم مسافروں کو نشانہ بنانا انتہائی بزدلانہ فعل ہے، فتنہ الہندوستان کے دہشتگرد سافٹ ٹارگٹ کو نشانہ بنا کر امن کو سبوتاژ کرنے کی گھناؤنی سازش کر رہے ہیں۔
محسن نقوی نے کہا کہ قوم کی حمایت سے بھارتی اسپانسرڈ دہشتگردوں کی ہر سازش کو ناکام بنائیں گے۔
ادھر، وزیراعلیٰ سندھ مراد علی شاہ نے قلات میں مسافر کوچ پر فائرنگ کی مذمت کردی، ان کا کہنا تھا کہ معصوم مسافروں کو نشانہ بنانا انتہائی وحشیانہ عمل ہے، دہشتگرد پاک سرزمین کے لیے ناسورہیں۔
واضح رہے کہ 10 جولائی کو دہشت گردوں نے کوئٹہ سے پنجاب جانے والی 2 مسافر بسوں سے 9 مسافروں کو شناخت کے بعد اغوا کرکے شہید کردیا تھا۔
ڈان اخبار میں شائع رپورٹ کے مطابق بلوچستان ضلع کے ژوب اور لورالائی کی سرحد پر واقع سورڈکئی کے علاقے میں دہشت گردوں نے کوئٹہ سے لاہور جانے والی 2 کوچز میں سوار کم از کم 9 مسافروں کو اغوا کرنے کے بعد قتل کر دیا تھا۔
ژوب کے اسسٹنٹ کمشنر نوید عالم نے بتایا تھا کہ دونوں کوچز سے اغوا کیے گئے 9 افراد کو قتل کر دیا گیا۔
